Ambasadorja Bitri përgëzon Ermal Metën për fitoren dhe e falënderon për emocionet - Shqiptari i Italisë

Itali
Mesazheve të shumta të përgëzimeve e urimeve drejtuar Ermal Metës pas triumfit me Fabrizio Moron në edicionin e 68-të të Festivalit të Sanremos , u bashkohet edhe përshëndetja e ambasadores së Shqipërisë në Romë, zonja Anila Bitri.  Artistit i dërgon një mesazh me të cilin e përgëzon jo vetëm si artist por edhe për “angazhimin në temat e çështjet e kohës që jetojmë”. Suksesi i Ermalit, kujton ambasadorja Bitri “është shprehje e modelit më të mirë të fitores së vlerës së një kulture të re të përbashkët që ngrihet mbi frikën dhe paragjykimet, në luftën kundër dhunës dhe terrorizmit”.
Në vijim teksti i plotë i mesazhit të ambasadores:

I dashur Ermal,

Urime dhe përgëzime për Çmimin e Parë të Festivalit të Sanremos 2018!

Në këtë shfaqje të bukur disaditore të muzikës, artit dhe kulturës italiane ju dëshmuat përsëri, talentin, pasionin dhe angazhimin tuaj, tashmë të rritur e të pjekur, jo vetëm si artist, por edhe si person i angazhuar në temat dhe çështjet e kohës që jetojmë!

Zërat, fjala dhe kënga e duetit Ermal Meta & Fabrizio Moro transmetojnë refrenin, ritmin, forcën dhe angazhimin që thërret për të mposhtur frikën dhe për të mbrojtur vlerat, të bukurën dhe jetën.

Suksesi i “Non mi avete fatto niente” është shprehje e modelit më të mirë të fitores së vlerës së një kulture të re të përbashkët që ngrihet mbi frikën dhe paragjykimet, në luftën kundër dhunës dhe terrorizmit”.

Edhe një herë, urime dhe faleminderit për emocionet!
Anila Bitri

Leggi anche:
Ermal Meta e Fabrizio Moro, i vincitori di Sanremo 2018
Ermal Meta e Fabrizio Moro restano in gara

Ermal Meta, Fabrizio Moro e la loro canzone contro il terrorismo