Emigrantët kthehen për festa. Radhë në kufirin me shtetin grek - Shqiptari i Italisë

Kronikë

Me rastin e festave të fundvitit në pikat kufitare mes Shqipërisë e Greqisë është regjistruar fluks i madh emigrantësh. Mbi 12 mijë emigrantë kanë hyrë në 24 orët e fundit në Kakavijë e Kapshticë

Tiranë, 24 dhjetor 2011 –Sot në vigjiljen e Krishtlindjeve, që në orët e para të mëngjesit është regjistruar fluks i madh emigrantësh në të dyja pikat kufitare mes Shqipërisë e Greqisë, Kakavijë e Kapshticë. Në 24 orët e fundit kanë hyrë në Kakavijë 5.500 emigrantë, ndërkaq në tokën helene janë krijuar radhë të gjata pritjesh. Radhët e gjatë në kufirin grek krijohen edhe për shkak të sporteleve të pakta në dispozicion të kalimtarëve. Kështu pala greke punon me 3 sportele në hyrje dhe 3 në dalje, ndërkohë që pala shqiptare ka 5 sportele në hyrje dhe 4 në dalje.

Ndërsa në pikën kufitare të Kapshticës deri sot rreth mesditës kanë hyrë rreth 7 mijë emigrantë. Edhe këtu pala shqiptare ka shtuar sportelet duke punuar me 8 të tilla, ndërkohë që pala greke punon vetëm me 4.

Emigrantët që hyjnë përmes pikës së kufitare të Kapshticës sqarojnë se vonesa ka vetëm nga pala greke. “Në tokën greke presim më shumë se 2 orë. Radha në tokën neutrale shkon deri në 3 korsi”, thonë ata.