Shqipëri-Itali - Shqiptari i Italisë

Dekorata e lartë i është akorduar dje në Tiranë nga Presidenti i Shqipërisë Ilir Meta që gjatë fjalës së tij theksoi rolin e D’Alemës dhe të qeverisë italiane “në momente të vështira të historisë sonë, në kohën e ndërhyrjes së NATO për t’i dhënë fund gjenocidit në Kosovë dhe pastrimit etnik”

Tiranë, 20 prill 2018 – “Duke i shprehur mirënjohjen e thellë, Kryeministrit D’Alema për të gjithë mbështetjen ndaj Shqipërisë, Kosovës dhe shqiptarëve në tërësi, në rrugëtimin e tyre drejt lirisë dhe Bashkimit Europian, dëshiroj që t’i akordoj sot dekoratën e lartë “Nënë Tereza””. Me këto fjalë presidenti i Republikës së Shqipërisë Ilir Meta i ka dhënë dje Massimo D’Alemës

Dekoratën “Nënë Tereza”, gjatë një ceremonie të veçantë, të mbajtur në Tiranë në prani edhe të Kryeministrit Edi Rama, Ministrit për Evropën dhe Punët e Jashtme, Ditmir Bushati, shumë deputetëve, ish-ministrave, përfaqësuesve të trupit diplomatik.

Në fjalën e mbajtur gjatë ceremonisë, Presidenti Meta i shprehu ish kryeministrit italian mirënjohjen për mbështetjen e tij të vazhdueshme në procesin e integrimit euroatlantik dhe europian të Shqipërisë.

Mes të tjerash Presidenti Meta tha se “të gjithë shqiptarët e kanë të ngulitur mirë në mendje emrin dhe personalitetin e Massimo D’Alemës. Ai është një nga figurat kryesore të politikës italiane, pagëzuar edhe me emrin “lider maximo”, për vizionin, kurajën dhe përpjekjen e palodhur për të reformuar të majtën dhe në tërësi politikën italiane”.

Presidenti vlerësoi mbështetjen historike që qeveria italiane e drejtuar nga D’Alema dha për ndalimin e gjenocidit dhe spastrimit etnik në Kosovë. “Massimo D’Alema do të mbante pozicione kyçe në politikën dhe qeverinë italiane në momente të vështira të historisë sonë, në kohën e ndërhyrjes së NATO për t’i dhënë fund gjenocidit në Kosovë dhe pastrimit etnik. Ndonëse me kundërshtime të forta brenda koalicionit të së majtës që drejtonte Italinë, Qeveria e tij luajti rol kryesor në mbështetjen e aksionit historik të NATO-s që kontribuoi për lirinë e Kosovës dhe paqen në rajon” u shpreh Ilir Meta.

“Shqipëria ka bërë një përparim të madh që nga ajo kohë, - ka vazhduar Presidenti duke përmendur anëtarësimin në NATO e nisjen së shpejti të negociatave të anëtarësimit në BE - Por arritjet tona na bëjnë gjithmonë të kujtojmë e vlerësojmë veçanërisht miqtë e mirë që na u gjendën në kohë të vështira dhe falë mbështetjes të të cilëve përballuam sfida të jashtëzakonshme”.

“Duke falënderuar edhe një herë z. D’Alema për gjithçka ka bërë për vendin tonë – përfundoi Meta - shpreh bindjen që do të vazhdojë ta bëjë edhe në të ardhmen për forcimin e marrëdhënieve mes Shqipërisë e Italisë dhe dy popujve tanë”.

Shqiptari i Italisë
(Ndiqni Shqiptariiitalise.com edhe në Facebook dhe Twitter)

 

 

 

Prej vitesh mediat italiane përsërisin që 19.000 italianë jetojnë e punojnë në Shqipëri. Por sipas ministrisë së Brendshme shqiptare janë më pak se 2.000. Si shpjegohet një dallim i tillë shifrash? 
Nga Nicola Pedrazzi [i]

Ministri i jashtëm italian përshëndet dialogun e rigjetur politik në Shqipëri

Romë, 18 maj 2017 – “Mirëpresim lajmet që vijnë në këto orë nga Tirana dhe që tregojnë rigjetjen e dialogut mes palëve politike shqiptare, me qëllim identifikimin e afatet kohore dhe procedurave të përbashkëta për mbajtjen e zgjedhjeve të ardhshme parlamentare në Shqipëri”. Këtë ka deklaruar ministri i Jashtëm Alfano lidhur me ngjarjet e fundit në Shqipëri, siç lexohet në një komunikatë të ministrisë së Jashtme italiane. shtme

“Shpresojmë se një marrëveshje do të mund të formalizohet së shpejti, për të përforcuar më tej rrugëtimin demokratik të Shqipërisë dhe duke mundësuar kështu që Tirana të rinisë rrugën drejt integrimit të plotë evropian. Italia e konsideron këtë rrugë drejt BE-së, thelbësore dhe të domosdoshme për stabilitetin dhe begatinë e Rajonit. Italia do të vazhdojë të garantojë mbështetjen e saj gjithnjë e në veçanti duke nisur nga funksionet aktuale të Kryesimit të radhës të Procesit të Ballkanit Perëndimor” ka përfunduar ministri Alfano.

 

Për të intensifikuar bashkëpunimin mbi sigurinë, kundër kriminalitetit e emigracionit klandestin

Romë, 18 maj 2017 - Bashkëpunimi në sektorin e sigurisë dhe të luftës kundër terrorizmit, kontrolli i kufijve dhe lufta ndaj emigracionit të parregullt, kryesisht të të miturve, e trafikut të drogës kanë qenë temat kryesore të takimit të djeshëm në selinë e Ministrisë së Brendshme në Romë mes ministrit italian Marco Minniti dhe homologut të tij shqiptar Fatmir Xhafaj. Këtë thonë njoftimet për shtypin e Viminales dhe e ministrisë së Brendshme shqiptare.

“Minniti e Xhafaj kanë rënë dakord të intensifikojnë më tej bashkëpunimin operativ e hetimor mes forcave të Policive. – lexohet në komunikatë – Janë programuar kurse formimi e përditësimi, për të kundërshtuar dukuri kriminale vendase e transkombëtare, duke përforcuar shkëmbimin e informacioneve edhe për luftën ndaj trafikut të substancave narkotike”.

Ndërsa në njoftimin për shtyp të ministrisë së Brendshme të Shqipërisë saktësohet se në takim “u vendos të krijohet një grup pune i përbashkët i dy ministrive për përgatitjen e disa marrëveshjeve të rëndësishme dypalëshe, si: marrëveshje në luftën kundër terrorizmit; marrëveshje në luftën kundër mbjelljes dhe trafikimit të lëndëve narkotike; marrëveshje në fushën e mbrojtjes së dëshmitarëve të drejtësisë; marrëveshje në fushën e turizmit (kryesisht në menaxhimin e përbashkët të kontrollit kufitar), marrëveshje në fushën e migracionit të paligjshëm (kryesisht të fëmijëve të mitur të pashoqëruar), si dhe binjakëzimin e Akademive të Sigurisë.

Ministri Xhafaj gjatë vizitës në Romë zhvilloi një takim edhe me Prokurorin e Drejtorisë Kombëtare të Antimafias, Franco Roberti, me të cilin “u diskutua mbi reformën në drejtësi, si dhe u ra dakord për thellimin e marrëdhënieve të ndërsjellta dypalëshe, kryesisht në drejtim të hetimeve të përbashkëta në luftën kundër trafikut të lëndëve narkotike dhe grupeve të strukturuara kriminale”.

 

 

 

 

 

 

Ndërsa numri i të miturve shqiptarë të pashoqëruar në Itali vazhdon të rritet, përfaqësues të ministrive të ndryshme të të dyja vendeve janë mbledhur në Romë për të trajtuar çështjen

Romë, 17 maj 2017 – Tre muaj më parë, vinim në dukje që në fund të vitit 2016, me 1.611 prani, të miturit e pashoqëruar shqiptarë përbënin komunitetin e tretë në Itali. E sot? Të dhënat e ministrisë së Punës, të përditësuara në fund të trimestrit të parë të këtij viti tregojnë se situata nuk është përmirësuar aspak: ndërsa numri i përgjithshëm i të miturve të huaj të pashoqëruar ka rënë (15.458 në 31 mars 2017 ndërsa ishte 17.373 më 31 dhjetor 2016), ai i shqiptarëve është rritur e ka shkuar në 1.672 vetë, duke mbetur komuniteti i tretë.

Fëmijët e huaj të braktisur në Itali
(sipas të dhënave të ministrisë së Punës)

Data

Shqiptarë

Renditja

Gjithsej

31/03/2017

1.672

Të tretët

15.458

28/02/2017

1.621

Të tretët

15.085

31/01/2017

1.598

Të tretët

15.205

31/12/16

1.611

Të tretët

17.373

31/12/15

1.432

Të dytët

11.921

31/12/14

1.087

Të pestët

14.243

31/12/13

804

Të tretët

8.461

31/12/12

708

Të tretët

7.575

Ndërkaq, ndryshe nga tre muaj më parë kur nuk kishim asnjë të dhënë rreth një shqetësimi të mundshëm rreth problemit nga pala shqiptare, këtë radhë mund të shkruajmë se ka nisur një bashkëpunim mes dy vendeve, frytet e të cilit do të duan ca kohë të dalin në dritë.

Më 10 prill është mbajtur një tryezë pune italo-shqiptare, apo komision i përbashkët, me pjesëmarrjen e disa ministrive. Shqipëria përfaqësohej aty me ambasadoren Anila Bitri, me drejtorin e Drejtorisë së Çështjeve Konsullore në Ministrinë e Jashtme, Arqile Sota, dhe përfaqësues të ministrisë Punës dhe të Brendshme. Po ashtu edhe pala italiane, e cila veç funksionarëve të ministrive të Jashtme, të Brendshme e të Punës, kishte edhe përfaqësues nga ajo e Drejtësisë.

Ky ishte takimi i parë i përbashkët, i paraprirë nga punë përgatitore si në Itali ashtu edhe në Shqipëri. – thonë për Shqiptariiitalise.com nga Ambasada e Shqipërisë në Romë – Në këtë takim të parë u parashtrua gjendja, si shifrat ashtu edhe përqendrimi sipas rajoneve apo të dhëna të tjera të karakterit statistikor”.

Për çfarë u ra dakord në këtë takim? Jo për ndonjë gjë shumë konkrete për zgjidhjen e problemit, me thënë të vërtetën, por gjithsesi një hap i parë ishte sa i nevojshëm aq edhe i rëndësishëm.

“Palët, të ndërgjegjshme se problemi nuk është vetëm i lidhur me kontrollin kufitar, ranë dakord që përmes një reflektimi të pavarur mbi të dhënat, informacionet dhe ballafaqimet e asaj dite, do të analizojnë, përpunojnë dhe propozojnë zgjidhje të mundshme njëri-tjetrit. – thonë nga Ambasada që mes gjërave për t’u propozuar përmend – Mendojmë se do të merret në konsideratë edhe çështja e bashkëtutorimit të titujve, diplomave të barazvlefshme në qendrat e formimit profesional të të dy vendeve”.

Vendimi më konkret i tryezës, është ai i thirrjes së një takimi tjetër në Tiranë, sa më shpejt, ndoshta brenda këtij muaji, me synimin e arritjes së “një marrëveshjeje dypalëshe për adoptimin e masave konkrete në përballje dhe mbikqyrje të problemit në fjalë”. Madje “në Tiranë do të ketë një përfshirje më të gjerë të insitucioneve që duhet të mbikëqyrin situatën në mënyrë konstante, siç do të jenë Ministria e Drejtësisë, Ministria e Arsimit dhe Avokati i Popullit” sqarojnë nga Ambasada.

K.B. / Shqiptari i Italisë
(Ndiqni Shqiptariiitalise.com edhe në Facebook dhe Twitter)

Lexo edhe:
15-vjeçari “i braktisur” në Itali akuzohet për mashtrim ndaj shtetit
Të miturit shqiptarë “të braktisur” në Itali. A shqetëson Shqipërinë kjo çështje?
Si të pajisesh shpejt me një lejeqëndrim në Itali. Mënyra e shqiptarëve
“Braktisja” e të miturve në Itali, paditen 66 shqiptarë
Të miturit e braktisur
“Eksodi" i të miturve

 

Presidenti i Senatit të Italisë, Pietro Grasso, i ka dërguar një mesazh urimi Ilir Metës pas zgjedhjes së tij President i Republikës së Shqipërisë.
Pasi e përgëzon për këtë detyrë të re, Grasso shpreh bindjen se marrëdhëniet e mira mes Italisë dhe Shqipërisë do të forcohen edhe më tej gjatë mandatit të Metës në postin e Presidentit të Republikës së Shqipërisë.

I dashur Presidenti Meta,
dëshiroj sinqerisht t’ju përgëzoj për zgjedhjen tuaj si President i Republikës së Shqipërisë dhe të uroj çdo sukses për ju personalisht dhe për popullin shqiptar.
Jam i sigurt se marrëdhëniet e respektit të ndërsjelltë, miqësisë dhe bashkëpunimit midis dy vendeve tona do të rriten më tej gjatë mandatit tuaj presidencial.
Duke shprehur konsideratën time më të lartë,
me respekt
Pietro Grasso”.

 

“Rai duhet të flasë shqip” është titulli i një shkrimi të shkurtër në një nga blogjet e repubblica.it. Në të vërtetë është fjala për një propozim të bërë nga Komisioni parlamentar për mbikëqyrjen e radiotelevizionit shtetëror mes sugjerimeve të miratuara më 11 prill për modifikimin e Skemës së dekretit të qeverisë me të cilin i përtërihet RAI-t koncesioni i shërbimit publik radioteleviziv për dhjetë vjetët e ardhshëm.  

Sugjerimi i transmetimit edhe në gjuhën shqipe bëhet në kuadrin e ligjit 482 të vitit 1999 që tutelon gjuhët e pakicave në Itali. Praktikisht parlamentarët sugjerojnë – e nuk është e thënë që qeveria t’i marrë parasysh propozimet e Komisionit – që RAI të prodhojë e të transmetojë emisione televizive dhe radiofonike në gjuhën shqipe në zonat e arbëreshëve.

Më saktësisht, kërkohet që nenit 3, paragrafi 1, germa g të “Skemës së dekretit me të cilin i ripërtërihet besimi në koncesion i shërbimit publik televiziv, radiofonik dhe multimedial ndërmarrjes RAI” që parashikon “prodhimin e shpërndarjen e transmisioneve radiofonike dhe televizive, si dhe të produkteve audiovizive në gjuhën gjermane e ladine për provincën autonome të Bolzanos, në gjuhën ladine për provincën autonome të Trentos … dhe në gjuhën sllovene për krahinën autonome të Friuli Venezia Giulia-s”:

t’i shtohetdhe në gjuhën shqipe dhe në gjuhët e tjera ë mbrojtura me ligjin 482 të 15 dhjetorit 1999 në zonat e përkatësisë, sipas mënyrave të përcaktuara nga kontrata kombëtare e shërbimit":

Edhe pse risia, nëse qeveria do ta merrte parasysh këtë sugjerim, do të ishte interesante për të gjithë shqipfolësit në Itali, me sa shihet nga ç’shkruhet në aktet e Parlamentit, nuk është aspak fjala që RAI duhet detyruar të flasë shqip për shkak të numrit të lartë të shqiptarëve të ardhur këtu nga 1990 e këtej, siç lë të kuptohet shkrimi në blogun e Repubblica.it. Nga ana tjetër, nëse do të ishin 600 mijë shqiptarët e sotëm të Italisë (mes atyre me lejeqëndrim e atyre me pasaportë italiane tashmë) që do të detyronin parlamentarët të këshillonin qeverinë që të fusin edhe shqipen mes gjuhëve në të cilat duhet të trasmetojë RAI, nuk kuptohet pse e njëjta gjë të mos këshillohej për gjuhën rumune apo arabe: komuniteti i rumunëve në Itali janë sa dyfishi i atij të shqiptarëve, numri i marokenëve në Itali është pak a shumë i njëjtë me atë të shqiptarëve.

 

Në vitin 1993, sipërmarrësi napolitan Angelo Frascino ka hedhur në gjyq shtetin shqiptar në gjykatën ndërkombëtare të Arbitrazhit dhe ka fituar një dëmshpërblim prej 48 miliardë liretash italiane. Për më shumë se dy dekata ka tentuar pa sukses në gjykatat shqiptare të fitojë të drejtën për të ekzekutuar atë vendim. Pa ia arritur, i drejtohet drejtësisë italiane e fiton. Sot, bashkë me interesin prej 13% në vit për 23 vjet, shteti shqiptar i detyrohet 141 milionë eurosh dëmshpërblim familjarëve të sipërmarrësit që ndërkohë ka vdekur
Nga Lindita Çela, BIRN

5 Maji 2015 duhej të ishte një e martë e zakonshme pune për të ngarkuarën e financës së konsullatës shqiptare në Milano, e cila u paraqit në Bankën Unicredit për të derdhur rrogat e punonjësve nga llogaria rrjedhëse.

Por ndryshe nga të martat e tjera çdo fillim muaji, ky veprim është kundërshtuar nga banka Unicredit, punonjësit e së cilës bënë me dije se llogaria rrjedhëse e konsullatës shqiptare ishte bllokuar pas një vendimi të 22 korrikut 2014 të Gjykatës së Apelit Romë për llogari të shoqërisë “Iliria Sh.p.k”.

Në të njëjtën ditë, konsullja e përgjithshme e Shqipërisë në Milano, Luljeta Çobani, i është drejtuar e alarmuar me një shkresë urgjente Ministrisë se Punëve të Jashtme, duke e njoftuar për situatën e krijuar.

“Ju bëjmë me dije se nga dita e sotme, të gjitha veprimet që kryejnë shtetasit shqiptarë për aplikim për pasaportë dhe veprime konsullore kalojnë në llogarinë e bllokuar,” i shkruan Çobani MPJ-së.

“Në këto kushte, jemi të mendimit që deri në zgjidhjen e situatës pagesat të bëhen me para në dorë, si për pasaporta dhe veprime konsullore. Me këto të fundit të mbulojmë shpezimet e konsullatës,” shtoi ajo.

Të dhënat dhe dokumentet e siguruara nga BIRN tregojnë se situata e pazakontë e krijuar në Maj 2015 me bllokimin e llogarisë bankare të konsullatës së Milanos i ka rrënjët në një kontratë të lidhur midis qeverisë shqiptare dhe një sipërmarrësi italian në Mars të vitit 1991-në prag të rrëzimit të regjimit komunist në Shqipëri.

Kjo kontratë kishte për qëllim krijimin e një kompanie italo-shqiptare me me aksione të përbashkëta midis Ndërmarrjes Komunale në Plazhin e Durrësit dhe Iliria S.r.l në pronësi të  investitorit napolitan, Angelo Frascino, për zhvillimin e zonës turistike të qytetit bregdetar.

Për shkak të ndryshimeve politike në vend,  kompania italo-shqiptare nuk ka mundur të zhvillojë projektin e saj. Kjo nuk e ka  penguar Angelo Frascinon që në  maj të vitit 1993 t’i drejtohet gjykatës ndërkombëtar të Arbitrazhit, duke fituar një dëmshpërblim prej 48 miliardë liretash italiane kundër shtetit shqiptar.

Për më shumë se dy dekada, Iliria S.r.l dhe familja Frascino ka tentuar pa sukses të fitojë të drejtën për të ekzekutuar vendimin e vitit ‘93 në gjykatat shqiptare.

Por dështimi në Shqipëri nuk e ka shkurajuar kompaninë Italiane, e cila në Korrik 2014 ka arritur ta konfirmojë vlefshmërinë ligjore të Arbitrazhit dhe një vendim për ekzekutim të detyrueshëm ndaj palëve të treta, me të cilët Shqipëria ka marrëdhënie ekonomike në Gjykatën e Apelit dhe Tribunalin e Romës.

Autoritetet shqiptare kanë reaguar me plogështi ndaj vendimeve të gjykatave italiane. Vendimi i arbitrazhit të vitit 1993, bashkë me interesin prej 13 % në vit për 23 vjet kap një vlerë prej 141 milionë eurosh dëmshpërblim në dëm të vendit.

Pala shqiptare është njoftuar për vendimin në rrugë diplomatike me notë verbale në Tetor 2014, por të dhënat e siguruara nga BIRN tregojnë që Avokatura e Shtetit nuk ka reaguar për mëse 8 muaj- deri në Maj 2015, kur pas bllokimit të llogarive bankare të Konsullatës, ka kontraktuar me urgjencë një avokat italian për të kundërshtuar vendimin e Gjykatës së Apelit Romë.

Edhe pse tashmë i pezulluar, Avokatja e Shtetit Alma Hicka pranon se vendimi i gjykatës italiane ka krijuar një precedent të rrezikshëm për shtetin shqiptar.

Biznes me shtetin komunist

Kur biznesmeni napolitan, Angelo Frascino erdhi në Shqipëri në Mars të vitit 1991,  regjimi gati gjysmë-shekullor komunist po përjetonte grahmat e fundit. Frascino i vuri syrin zonës së plazhit të Durrësit, e cila në atë kohë administrohej nga Ndërmarrja Komunale e Plazhit Durrës.

Frascino i propozoi qeverisë shqiptare një plan për zhvillimin turistik të zonës së plazhit të Durrësit me ndërtimin e resorteve,  vilave,  bankave, pallateve, kazinove  apo njësive të banimit të përshtatshme për 60.000 banorë, me një afat kohor prej 20 vjetësh.

Megjithëse projektit i mungonte një faturë financiare, një vendim i Këshillit të Ministrave i marrë me 28  Mars 1991 – tre ditë përpara zgjedhjeve të para pluraliste në Shqipëri, autorizonte ish Ndërmarrjen Komunale të Plazhit të Durrësit  të krijojë shoqërinë e përbashkët italo- shqiptare me kompaninë e Frascinos “Iliria S.r.l.”

Një ditë para zhvillimit të zgjedhjeve në vend, gjatë heshtjes elektorale të 30 Marsit 1991, mes Iliria S.r.l dhe ish ndërmarjes komunale nënshkruhet kontrata e themelimit të shoqërisë mikse, “Durrazo-Iliria-Frascino, DIF,” e cila kishte për qëllim “ripërtëritjen (modernizimin) e plazhit të vjetër si dhe shfrytëzimin turistik të zonës bregdetare shqiptare.”

Kompania italiane e regjistruar nga Frascino, Iliria S.r.l zotëronte 51 % të aksioneve në kompaninë Italo-Shqiptare dhe pjesa tjetër zotërohej nga ndërmarrja komunale publike e Durrësit.

Për palën shqiptare, kontrata është firmosur nga ish kryetari i Komitetit Ekzekutiv të Durrësit, Fatmir Minguli dhe ish drejtori i Ndërmarrjes Komunale të Plazhit të Durrësit, Jetgjat Todri.

Në lidhje me këtë kontratë kanë lindur divergjenca interpretative midis palës shqiptare dhe kompanisë italiane, e cila në bazë të nenit 2 të kontratës, filloi një gjykim arbitrazhi ndërkombëtar kundër qeverisë shqiptare në vitin 1993.

Gjyqi i arbitrazhit

Tre arbitra, mes të cilëve dhe  shqiptari Fatmir Laçej morën me 19 Prill 1993 në shqyrtim padinë e bërë nga shoqëria Iliria S.r.l kundër shtetit shqiptar.

Tribunali i vendosur në Dhomën e Tregtisë në Tiranë për 6 muaj shqyrtoi të gjitha pretendimet e palës italiane në dështimin e marrëveshjes së zhvillimit të zonës bregdetare të gjirit të Durrësit.

Për qeverinë e asaj kohe, fakti që kjo marrëveshje ishte nënshkruar nga ish Ndërmarrja Komunale e Plazhit të Durrësit nuk legjitimonte përfshirjen e qeverisë si palë në arbitrazh. Në 6 muaj që zgjati  ky proces, pala shqiptare është paraqitur vetëm në një seancë të vetme, e përfaqësuar nga avokatja Lejla Gjini.

Biznesmeni napolitan Frascino ka pretenduar gjatë gjyqit të arbitrazhit se qeveria shqiptare nuk i është përmbajtur kontratës së nënshkruar për zhvillimin e plazhit të Durrësit, për shkak se tokën pranë plazhit  dhe pranë pyllit me pisha  gjatë gjithë shtrirjes bregdetare ia ka dhënë palëve private për të kryer veprimtari bujqësore.

Pjesë e pretendimeve të Frascinos është dhe mossigurimi i kushteve dhe ambienteve për punë, si zyra apo dhe mjedise të tjera, që sipas kontratës ishin detyrim i ish Ndërmarrjes Komunale për t’i ofruar.

Angelo Frascino pretendoi gjithashtu se ai ka hartuar projektet për resortin turistik  të quajtur “Epidamus” dhe atë të kazinosë “Diamant” dhe se ndryshimet  e ndodhura  me përmbysjen e regjimit komunist  penguan zhvillimin e tyre.

Sipas akteve të paraqitura në arbitrazh, Frascino fajëson shtetin shqiptar se tokat e ndërmarrjes së përbashkët në zonën e Golemit, Qerretit dhe Karpenit,  iu dha privatëve  për ta përdorur për bujqësi, në vend që të zhvilloheshin për turizëm, sipas kontratës së lidhur me Iliria S.r.l.

“Shteti shqiptar ndryshoi ndarjen territoriale ndërmjet komunave, duke i dhënë komunës së Kavajës  një pjesë të territorit të përfshirë në kontratë.  Iu kthyen  pronarëve të  vjetër  pasuritë  e patundshme  ekzistuese në terrenin objekt të kontratës  duke shkelur në këtë mënyrë marrëveshjen e bërë më datë 30 Mars,” thuhet në pretendimet e bëra në Tribunal nga Angelo Frascino.

Pas 6 muajsh shqyrtimi të kontratës së nënshkruar në ditët e fundit të komunizmit në Shqipëri,  trioja e arbitrazhit e udhëhequr nga profesori turko-qipriot Ahmet Aker, del me vendim në 3 shtator 1993, duke  vendosur se qeveria shqiptare nuk i ka plotësuar detyrimet e marra përsipër ndaj palës italiane.

Trupa arbitrale vendosi dënimin e qeverisë shqiptare për t’i paguar si dëmshpërblim kompanisë  Iliria S.r.l shumën prej 48 miliardë e 239 milionë lireta për dëmet e pësuara. Sipas Gjykatës, kjo shumë duhet të fryhet me interesa të mëtejshme  në masën e treguar prej 13 % në vit, deri në datën e pagimit të saj të plotë.

Kjo trupë gjyqësore detyron shtetin shqiptar të paguajë edhe avokaten e palës italiane në shumën e 507 milionë liretave si dhe  shpenzimet gjyqësore në vlerën e 150 mijë dollarëve amerikanë.

Ky vendim i gjykatës së arbitrazhit nuk është apeluar nga shteti shqiptar, ndërkohë që 5 vite më vonë, Angelo Frascino i drejtohet gjykatave shqiptare për njohjen dhe ekzekutimin e vendimit të tribunalit të arbitrazhit. ...

Lexo artikullin të plotë në Reporter.al: Qeveria e përgjumur, Shqipëria rrezikon 141 milionë euro nga arbitrazhi

 

 

 

 

 

 

 

Ku kanë përfunduar të diplomuarit universitarë italianë? Në një kohë kur në Itali papunësia mes të rinjve kapërcn vlerën 40%, shumë prej tyre i gjen jashtë shtetit, një pjesë në Shqipëri. Dy hapa larg, ku italianët ndihen si në shtëpi të tyre, vend në zhvillim që ofron më shumë mundësi se Roma apo Palermo, me rrogë më të vogël por që në proporcion me koston e jetesës rezulton më e mirë se çka ofrohet në Itali.
Është Matrix, programi televiziv i Canale 5, që i fundit në kohë jep një reportazh nga Tirana ku shkon e takon disa të rinj italianë. Ja çfarë ka transmetuar të premten e shkuar: